Паян, кӑрлач уйӑхӗн 12-мӗшӗнче, республикӑн транспорт тата ҫул-йӗр хуҫалӑхӗн министрӗ Владимир Осипов пассажирсене турттаракансемпе канашлу ирттернӗ. Ведомствӑн пресс-службинче пӗлтернӗ тӑрӑх, вӗсене ҫӑхавсем килнӗрен пухса калаҫнӑ.
Канашлӑва «Шупашкар-Ҫӗрпӳ» маршрутпа турттаракан 125 тата 173-мӗш тата «Шупашкар-Вӑрманкасси» маршрутпа турттаракан 123-мӗш маршрут хуҫисене йыхравланӑ.
173-мӗш маршрутпа кӑрлач уйӑхӗн 11-мӗшӗнче ҫӗнӗ перевозчик ӗҫе кӳлӗнмелле пулнӑ, анчах вӑл транспорта тепӗр кунне ҫеҫ рейса кӑларнӑ.
123-мӗш тата 125-мӗш маршрутпа пӗр рейспа тепӗр рейс хушши вӑрӑм, автобуссем ҫитмеҫҫӗ иккен. Перевозчиксем ӗнентернӗ тӑрӑх, ҫанталӑк шартлама сивӗ тӑнӑ кунсенче автобуссем чӗрӗлмен, хӑшӗсем ванса кайнӑ имӗш.
Владимир Осипов министр тивӗҫе йӗркеллӗ пурнӑҫламалли ҫинчен хытарсах каланӑ.
Чӑваш Енӗн Транспорт тата ҫул-йӗр хуҫалӑхӗн министерствинче ӗнентернӗ тӑрӑх, республикӑра пассажирсене саккуна пӑсса турттаракансене тупса палӑртассипе ӗҫлесси малалла пырать.
Раштав уйӑхӗн 22-мӗшӗнче черетлӗ рейд ирттернӗ. Унта ведомствӑн специалисчӗсемпе пӗрлех патшалӑхӑн ҫул-йӗр хӑрушсӑрлӑхӗн инспекторӗсем тухнӑ.
Пассажирсене йӗркене пӑсса турттарнине Шупашкар тата Етӗрне районӗсенче 2 тӗслӗх тупса палӑртнӑ. «Шупашкар-Мускав» маршрутпа ҫула тухнисем пӗлтернӗ тӑрӑх, вӗсем водительсемпе «бла-бла-кар» урлӑ калаҫса татӑлнӑ-мӗн.
Ятарлӑ ирӗк илмесӗр ӗҫлекен водительсем тӗлӗшпе адмирнистративлӑ протоколсем ҫырнӑ.
Шупашкарта пӗр-пӗр вокзал патне утса пынӑ чухне машинӑпа республикӑн тӗрлӗ кӗтесне (уйрӑмах Канаш, Патӑрьел тата Елчӗк районӗсене) илсе каяс кӑмӑллисем яланах йышлӑ. Вӗсем — ятарласа регистрациленмен, вӑрттӑн ӗҫлекен усламҫӑсем.
Ҫавсене тупса палӑртас тӗллевпе кӑҫал Чӑваш Енӗн Транспорт тата ҫул-йӗр хуҫалӑхӗн министерстви патшалӑхӑн ҫул-йӗр автоинспекцийӗн ӗҫченӗсемпе пӗрле 7 тӗрӗслев ирттернӗ, ҫав вӑхӑтра 6 водителе административлӑ майпа явап тыттарнӑ.
Пассажирсене вӑрттӑн турттаракансем ҫинчен ӗнер республикӑн Правительствинче иртнӗ ведомствӑсем хушшинчи ларура сӳтсе явнӑ, тивӗҫлӗ мерӑсем йышӑнасси пирки сӑмах хускатнӑ.
Муркаш районӗнче метан заправка уҫӑлнӑ. Вӑл — Ситуккасси ялӗ тӗлӗнче.
Заправкӑра икшер колонка вырнаҫтарнӑ. Кашнинче пӗр харӑсах икшер машина заправка витӗр тухайӗ.
Чӑваш Енӗн Транспорт тата ҫул-йӗр хуҫалӑхӗн министерствинче пӗлтернӗ тӑрӑх, ҫӗнӗ заправка пулӑшӑвӗпе сехетре 10 машинӑран кая мар, талӑкне вара 55 машина таран усӑ курайӗ.
Шупашкарпа Чулхула хушшинче унччен апла заправка пулман иккен. Унтах автомобильсен зарядка станцине те вырнаҫтарнӑ.
Канаш районӗнче те метан заправка уҫӑлӗ. Ӑна раштав уйӑхӗн ҫурринче ӗҫлеттерсе ярасшӑн.
Килес ҫул пирӗн республикӑри ҫул-йӗр ҫинче фоторадарсен шучӗ нумайланӗ. Сӑн тата видео ӳкерекен камерӑсене тепӗр 94 единица вырнаҫтарасшӑн.
Республикӑн Транспорт тата ҫул-йӗр хуҫалӑхӗн министерствинче пӗлтернӗ тӑрӑх, фоторадарсене ҫул ҫинчи инкексем уйрӑмах йышлӑ пулакан вырӑнсенче лартса тухӗҫ.
Машинӑсене виҫекен автоматика пунктне те тепре уҫӗҫ.
2021 ҫулта фоторадарсем пулӑшнипе республикӑри ҫулсем ҫинче правилӑна пӑснӑ 1 005 850 тӗслӗхе шута илнӗ, ку вӑл 2020 ҫулхинчен 3,9 процент пысӑкрах.
Хӗрлӗ Чутай районӗнчи икӗ яла: Хусанушкӑньне тата Тури Ҫӗрпӳкассине — асфальт ҫулпа ҫыхӑнтарӗҫ. Кун пирки Чӑваш Ен Элтеперӗ Олег Николаев патне йышӑнӑва кайсан асӑннӑ тӑрӑхри хастарсем пӗлсе килнӗ.
Республика ертӳҫи паян йышӑну ирттернӗ. Ун патне Юлия Федорова тата Раиса Соколова пынӑ. Вӗсем икӗ яла ҫулпа ҫыхӑнтарас ыйтӑва хускатнӑ.
Чӑваш Енӗн Транспорт тата ҫул-йӗр хуҫалӑхӗн министерствинче пӗлтернӗ тӑрӑх, хальхи вӑхӑтра проектпа смета документацине хатӗрлесе ҫитернӗ. Ҫул сарма хушма укҫа уйӑрас ыйтӑва бюджета тишкернӗ чухне пӑхса тухмалла.
Шупашкар районӗнчи Вӑрманкаса (Хыркасси патӗнчине) маршрутка каллех ҫӳреме пуҫланӑ.
Асӑннӑ ялта пурӑнакансем яла общество транспорчӗ ҫӳреме пӑрахни пирки тӗнче тетелӗнче пӗр кунхине пӑшӑрханса пӗлтернӗ. 123-мӗш маршрутпа ҫынсене унччен микроавтобус турттарнӑ иккен, анчах авӑн уйӑхӗн 1-мӗшӗнче вӑл ҫула тухман.
Ҫак лару-тӑру пирки Чӑваш Енӗн Транспорт тата ҫул-йӗр хуҫалӑхӗн министерствине пӗлтернӗ. Халӗ каллех маршруткӑсем хутлама тытӑннӑ.
Шупашкартан Ҫӗнӗ Шупашкара тата Кӳкеҫе ҫӳрекен маршруткӑсен маршручӗсен схеми улшӑннӑ. Ку хыпара республикӑн Транспорт тата ҫул-йӗр хуҫалӑхӗн министерстви пӗлтернӗ.
Муниципалитетсен хушшинчи 234-мӗш маршрут пассажирсене «Шупашкар-Ҫӗнӗ Шупашкар-Шупашкар» ҫулпа турттарать. Республикӑн тӗп хулинчи В.И. Чапаев ячӗллӗ производство пӗрлешӗвне кайнӑ чухне вӑл Энтузиастсен, Грасис, Граждан тата Социалистически урамсем тӑрӑх кайма тытӑннӑ; каялла ҫаврӑнса килнӗ чухне — Социалистически, Граждан, Эльмень тата Энтузиастсен урамӗсемпе.
Шупашкартан Кӳкеҫе хутлакан 325-мӗш маршрут «Хлеб» (чӑв. Ҫӑкӑр) общество патне ҫитет.
Улшӑну ҫурла уйӑхӗн 13-мӗшӗнчен вӑя кӗнӗ.
Чӑваш Енре пассажирсене автобуссемпе турттаракансене лизинг тӳлевӗшӗн субсиди парса пулӑшӗҫ. Республикӑн влаҫ органӗсен официаллӑ порталӗнчи хыпара ӗненсен, ку пуҫару авторӗ — Чӑваш Енӗн Транспорт тата ҫул-йӗр хуҫалӑхӗн министерстви.
«Таса чунпа ӗҫлекен, социаллӑ яваплӑ енпе тӑрӑшакансене пирӗн пулӑшмалла. Халӑха транспорта тивӗҫтерессин тытӑмне хатӗрленӗ май ӑнланмалла та уҫӑмлӑ, конкуренци аталаннӑ рынок йӗркелемелле», — палӑртса хӑварнӑ Чӑваш Ен Элтеперӗ Олег Николаев.
Тӗнчери тата ҫӗршыври лару-тӑрӑва пула Шупашкартан самолётсем кӑҫал кӑнтӑрти хӑш-пӗр хулана вӗҫме чарӑннӑ. Вӑл списокра — Симферополь, Краснодар, Минеральные Воды хулисем. Апла пулин те халӑх самолётпа вӗҫме юратать.
Кӑҫалхи ултӑ уйӑхра Шупашкарти аэропорт урлӑ 200 пине яхӑн пассажир ҫула тухнӑ. Пӗлтӗрхи кӑрлач-ҫӗртме уйӑхӗсенчинчен асӑннӑ кӑтарту 2 процент нумайрах.
Аэропорта юсаса ҫӗнетнӗ хыҫҫӑн аэропорт сехетре 200 пассажира йышӑнма пултарӗ, ҫавна май ҫулталӑкра – 500 пин ытла ҫынна. Ку цифрӑна республикӑн транспорт тата ҫул-йӗр хуҫалӑхӗн министрӗ Владимир Степанов палӑртса хӑварнӑ.
Шупашкарта ҫывӑх вӑхӑтра (11.05.2024 15:00) тӗтреллӗ ҫанталӑк, атмосфера пусӑмӗ 742 - 744 мм, 8 - 10 градус ӑшӑ пулӗ, ҫил 2-4 м/ҫ хӑвӑртлӑхпа кӑнтӑр-хӗвеланӑҫ енчен вӗрӗ.
| Евсевьев Макар Евсевьевич, ҫыравҫӑ, этнограф, мордва чӗлхин ҫыруллӑхне никӗслекенни вилнӗ. | ||
| Кӗҫтӳк Кольцов, чӑваш сӑвӑҫи вӑрҫӑра пуҫне хунӑ. | ||
| Белова Валентина Александровна, сӑвӑҫ ҫуралнӑ. | ||
Пулӑм хуш... |